我地每日食早餐都係對住依個view，真係好似幅畫咁！
食完早餐就開始我地第二個活動－Snowshoeing喇！其實即係行雪山，當然係難度最低果d啦！但首先，佢對鞋係勁難著架！著完已經冇左一半體力喇陰功！
睇下我著到頸巾都跌埋出黎就知幾辛苦啦！依個係帶我地行既導遊哥哥，超怕羞既芬蘭人，好可愛～有冇見到佢有條有d民族feel既腰帶？係用黎放佢把刀架，可能始終係偏遠山區啦～我見佢地個個芬蘭人都有一把，btw 條帶好靚 lol
雪鹿出沒注意！！！！！！！！！！！！好正呀！！！！！！勁大堆！！！
導遊哥哥引左佢地埋黎之後就比我地餵喇！！（心心眼）佢地食得好大力，要好大力捉實個兜，勁近距離接觸，好開心呀！！！！！！！
之後導遊哥哥話我地知追蹤雪鹿好容易架咋～只要跟住佢地d屎屎尿尿就會搵到（其實係咪所有動物都係？）
其實咁樣行法真係好Q攰！！！身上面又多野又重，果對咁既爛鬼鞋仲重！仲要不停上山落山，真係好攰！！所以返去之前大家都小休一下，我地見無聊，就周圍影下相，haha，好低能
玩到攰晒，返去休息下，食埋飯就出發！追蹤北極光！！！
真係靚到喊丫T_____T
hostel老闆叫我訓係雪地度睇北極光，正當我心入面暗暗地讚嘆緊大自然何其壯觀既時候，佢係我隔離訓低，細細聲同我講：「你知唔知你訓係一個五十米 深既湖上面」！！！我個心即刻離一離，郁都唔敢郁，好似我一郁，個湖就會好似電視既畫面咁裂開，之後我就會跌落去然後凍死，係我驚緊既時候，佢又開始講其他野
佢：你知唔知北極光係代表ｄ咩？
我：唔知呀！係代表ｄ咩？
佢：佢係代表一種邪惡力量，自殺既人就會連結到依種力量，所以芬蘭好多人自殺
我心諗：係咪真架？咁靚既野點解講到咁邪惡
佢指住個天又講
佢：你睇下～果度有粒好慢既流星，係比你可以慢慢許願架！
我：係咪真架？？？流星唔係好快架咩？
佢：你係咪傻架？我呃你架咋！依個人造衛星黎架！！
我：下？？人造衛星會發光架咩？？
佢：人造衛星梗係唔會發光架啦！！佢只係一粒好慢既流星！你快ｄ許願啦！
之後佢就走左．我到依家都唔知佢講既有幾多係真==”
p.s.到我起身準備走既時候又諗起佢話我係個五十米 深既湖上面，堅驚！
沒有留言:
張貼留言