芬蘭(1)：雪上電單車

指定動作!!!
今次搭芬蘭航空AY070，出發！

訓左十個幾鐘機，終於都到左芬蘭！！！去個洗手間，清醒下，過埋關，就去搭另一程內陸機往Ivalo出發！！！北極光我黎喇！！！

落機之後，一入去已經見到酒店職員舉牌歡迎我地，好窩心丫～好快拎埋行李就上車，白茫茫既芬蘭，感覺好特別！沿途司機先生都會講下四圍係d乜，原來有條路行9km就會到俄羅斯，不過已經封左嚕～又原來我地一直係沿住芬蘭第二大既湖行，但白茫茫一片，真係睇唔出囉==" 講下笑下，好快就到嚕～

依間就係我地依幾日入住既酒店，我地訂左個4日3夜既package，當中包括雪上電單車，snowshoeing (唔知中文係乜)，husky safari (都唔知中文係乜), 當然仲有最重要既北極光追蹤！！！

由於我份人比較孤寒，好少住酒店，除非同屋企人去旅行啦，但今次我地實在係去到好北既地方，係冇乜選擇既情況下，唯有揀最平既酒店，但對於住開hostel既我黎講已經好豪華！同埋我真係好鐘意鹿架！所以見到咁多鹿既裝飾，真係好興奮！！！

趁未有活動，周圍影下相，玩下雪，不過真係好Q凍！得果零下十幾廿度，所以玩左一陣就返左房休息嚕～

再一次踏出屋外既時候，抬頭就已經見到北極光喇！！！！靚到痴左線！！！感覺好夢幻好唔真實，雖然到左食飯時間，又勁凍，但真係唔捨得行開呀！！！睇住佢郁黎郁去，好似有生命咁，到d光線慢慢減弱，由我地見到果刻到消失，只係維持左幾分鐘，果然係可遇不可求，但已經覺得好幸運，已經好興奮，暗暗覺得自己會見到更靚既極光！！！

食完飯就開始準備出發玩雪上電單車，入夜後氣溫會得返零下廿幾度，而且係雪上奔馳都真係寒風刺骨，所以一定要著好晒酒店預備既衣物，著完之後個個都飛虎咁，型到爆！

btw，去拎裝備既時候巧遇hostel老闆，佢問我地邊度黎，咁我就答我地係香港黎既，佢問香港最凍有幾凍？我話某d地方最凍都會有零度，佢扮野打左個冷震話：凍死人咩 -0-

玩依架雪上電單車都唔算太難，不過就真係都幾攰，可能因為緊張啦～佢始終係一部電單車，感覺好似會好危險（但其實係好安全架）我地既時速大概係30km，風馳電制，都幾過癮！玩完之後已經好攰，要訓嚕～