意大利(4)：pizza發源地－拿玻里

離開威尼斯，就直落到拿玻里，黎到拿玻里，真係不得不提果間hostel！拿玻里係一個係意大利南部既城士，南部既地方，唔知點解感覺就會係好危險...

好記得當日到埗既時候已經天都黑晒，心入面其實都好淆底，再加上條街好多疑似古惑仔...堅驚....搵左好一陣，終於到達之前book定既hostel，有個意大利男人黎接我地

佢：你地係做咩事架？
我：我地係book左今日係度留一晚架
佢：下？今晚依度full左喇喎～
我：下？我book左架喎！
佢：其實我都只係住客，老細唔係度架，我幫你地打比佢啦～

接通左之後

老細：下？乜你地唔係聽晚住咩？哎呀！係喎！我攪錯左呀～唔好意思呀～今晚我依度full左架喇，你返火車站果邊搵下喇～果邊好多酒店

你唔好玩啦！！！！！！夜媽媽！！！！又要行返出去？？？又要行經果幾班古惑仔？？？我唔制架！！！

於是我同果個幫我地打電話既意大利男人講，我同我朋友訓廳啦～我地聽朝就會走架喇，唔該晒你幫我地打電話～

點知佢同我地講：
不如你地訓我間房啦～我有張雙人床，你地２個訓啦～我訓地下得架喇！

好感動呀！！！不過都要保留返少少矜持既～都講左幾句唔好～但見佢咁堅持，我唯有屈服啦！haha　無啦啦有一晚免費住宿，好開心！！

唔止咁呀！！第二朝訓醒，佢仲請我地食早餐同車我地去想去既地方，又介紹下意大利咁，成件事真係好柳暗花明又一村！

佢仲話我地知，係意大利，係冇交通規則依回事～安全帶唔駛戴，而且車都係橫衝直撞！嗯...真係好危險....

  

佢車到我地黎依度就走左嚕～遇上貴人，真係好感恩！

依度係早期國王住既新城堡

   

周圍行行走走就黎到翁貝托一世拱廊街（Galleria Umberto I）

友人表示同米蘭果個咪一樣～不過係縮細版之嘛！

對購物冇興趣既我地，影完相就走嚕～

   

那不勒斯王宮

王宮前面就係好大風既平民表決廣場

廣場既另一邊就係保羅聖芳濟聖殿

  

鏡頭一轉，就黎到聖卡洛劇院，係歐洲現存最古老而持續使用既歌劇院

  

  

新耶穌教堂！

唔好睇佢外表黑蚊蚊咁呀！內裏一樣係金碧輝煌！

最鐘意穿梭不同既大街小巷！

見到佢咁擺，如果係香港，我應該會以為佢係賣香haha，但係依度，梗係知佢係賣意粉啦！

  

黎到pizza既故鄉！梗係要食佢地既pizza啦！即叫即做！超好食！真心覺得佢係我食過最好食既pizza！juicy得黎個餅好脆！一個都只係4.x 歐羅！又平又好味！大力推介！

 　 

你以為佢地係用普通焗爐焗？梗係唔係啦！佢地傳統上係用燃燒木頭既烤爐黎燒，所以咪咁唔同味囉！

不過拿玻里依個地方....唔知點解感覺就係好危險...好冇安全感...雖然冇乜特別事發生，不過大家去既時候都係小心為上！