意大利(2)：水都－威尼斯

一講水都，相信大家都會諗到威尼斯，不過唔講你唔知，原來威尼斯以前係一個國家黎架！

今次我地唔係住係個島入面，所以都要搭一程火車先入到去，大概幾分鐘，而且我地有火車證，反正唔駛另外比錢，冇所謂啦～

係歐洲好多時都見到依ｄ烤雞，又平又好味，而且仲好飽肚添！我地都成日食！正呀！

依ｄ就係著名既貢多拉，其實都係做遊客生意啦！船伕都會著住依ｄ黑白間條衫，不過坐一次都唔平，我依ｄ孤寒鬼就唔捨坐喇....

每年既威尼斯嘉年華會都好多人慕名而黎，仲會著上各種宮廷服，戴埋依ｄ面具，但就算唔係嘉年華，周圍都見到好多各式各樣既面具，價錢由10歐至幾百歐不等架！

橫跨威尼斯大運河既雷雅爾大橋

我地係度影相既時候，依個男人突然衝埋黎攬住我，即刻２隻手捉實衫袋內既貴重物品，好彩最後都冇唔見野～應該都真係只係一個過於熱情既意大利人姐～

雖然威尼斯ｄ路好難認，成日都盪失路，不過佢一路上好多依ｄ指示，只要跟住佢行你就會行得返出去火車站～

依個牌真係笑死我，google translate真係害人不淺！究竟”您”係乜？xdddd

好鐘意睇依ｄ街邊檔

與貢多拉合照

勁多人既聖馬可廣場

行行下見到間法拉利喎～

嘆息橋－以前橋既２邊分別係法院同監獄，通常死囚被判刑，行過依條橋就會行刑，行刑前會從橋上既窗望出最後一眼既威尼斯，就會發出一聲嘆息！橋名就係咁而黎，另一方面，佢地又有一個傳說，就係話日落時候，情侶如果係橋下既貢多拉接吻，就會得到天長地久既愛情～真係奇怪，一個咁慘既地方又有一個咁浪漫既傳說，歐洲人真係好擅於將所有野浪漫化～

不得不承認，威尼斯真係一個點影都好靚既地方，但對我黎講，太過於商業化，不過都係值得一遊既！

小插曲：今次住左入一間感覺都幾怪既hostel，又唔係恐怖，但感覺就係怪怪地，話說間hostel每次出去都要放低鎖匙係reception，返黎先問佢拎返，咁我每次返黎呢～佢都同我講一大堆野，我都係聽唔明，通常哈哈哈，講聲唔該就走人，點知有一次，佢遞左條鎖匙比我，我未拎，又收返，又遞比我，又收返，（佢一直依依哦哦唔知講乜）好幾次之後，真係唔耐煩，做乜Q呀，之後佢用雙手，九陰白骨爪咁禁住我個頭又講左幾句我聽唔明既野，之後就比左條鎖匙我.....做咩姐，梅超風咩........