德國(4)：科隆－世界第三大哥德式教堂

又返一返德國先，德國第３站－科隆

一出火車站，真係嘩左出黎！依個教堂有冇咁大呀？？？？科隆大教堂，係世界第三高既教堂，亦係世界第三大既哥德式教堂！果然夠氣勢！依座教堂由１３世紀就開始起，起到１８８０年先完工，總共用左６００幾年既時間，以以前既技術，我真係完全想像唔到當時係要用幾多人力物力先起得到依座咁巨型既教堂！

直到依家，依間教堂都有人做彌撒架！所以入去既時候都要保持安靜，唔好騷擾到人！

好鐘意睇教堂ｄ窗，好多都好靚，有時仲會有故事添！

香水博物館，不過果日唔開，好煩呀！點解成日都摸門釘架.....

萊茵河－係歐洲最長既河流之一，流經列支敦士登，奧地利，德國同法國，最終係荷蘭流入北海，依度就可以買飛上船一遊萊茵河

買完飛之後見未夠鐘，就周圍行下睇下先再上船～

上得船嚕～原來都幾多人～

見到依個牌，其實好想去睇下，但搵極都搵唔到係邊，問又問唔到，最後都係放棄........

行行下，行到去好熱鬧既market！最鐘意行market！

HARIBO!!!!!!!!!!!!!!!!!!!!

德國腸真係好好食丫！！！！！特別係依種，加左d黃色粉既，我地覺得係咖哩粉既野，真係食極都唔厭！！！再加埋薯條，其實已經夠飽！

歐洲周圍都好多依d觀光火車，好得意～通常都係年紀比較大既人坐，我地依d後生仔就硬係自己行，周圍慢慢睇啦～

小插曲：歐洲M記好多時都有１蚊包，我地時不時都會食，係科隆時我地都有食，入到去

　我：唔該一個１蚊包，要雞～

職員：由於復活節既緣故，我地只係賣魚！

　我：下？？？？？？？？？？

（係我諗緊係咪我英文太差，誤解左佢意思既時候）

職員：愚人節快樂！

＝＿＿＿＿＿＿＿＿＿＝”